داهی گلمز بولورم یوخدی قراریم بو گئجه

بی وفا اولدی منه لاله عذاریم بو گئجه

آیریلان واخدا دئمیشدی گلرم غم یئمه چوخ

گوزومی یولدا قویوب چشم خماریم بو گئجه

من سئوردیم کی اولام مست، لب لعلیندن

کیمی مست ائلیه جک مست نگاریم بو گئجه

کونلوم ایستردی چکم نازین اگر ناز ائله سه

گلمه دی ناز ائلیه عشوه لی یاریم بو گئجه

دئدیم آغلاتما منی باغ و بهاریم سن سن

گوزوم آغلار قویوب اول باغ و بهاریم بو گئجه

گوزلری سویله دی درد و غمیمیز بیر اولاجاق

نچون آلداتدی منی مشک تتاریم بو گئجه

چوخ دیللر کی یانا عشق اودونا پروانه

عالمی یاندیراجاق آه و شراریم بو گئجه

گون گئدن واخدا دئدیم آغلاما غم چکمه کونول

گله جک گون یرینه آی کیمی یاریم بو گئجه

شمعه یالواررام آمان "ساقینی" رسوا ائله مه

گوز یاشیم اولدی منیم بوس و کناریم بو گئجه

شعر:جبرائیل سراجی علمداری " ساقی "